«Толық адам» жобасы аясында ақпараттық кездесу

2026 жылғы 29 қыркүйекте «Құқық» академиялық мектебінде «Толық адам» әлеуметтік жобасы аясында студенттермен кезекті кешенді ақпараттық-түсіндіру кездесуі өтті.

Іс-шараның басты мақсаты — ұлы Абайдың «Толық адам» тұжырымдамасын кеңінен насихаттау, рухани-адамгершілік құндылықтарды дәріптеу, жастардың құқықтық және қаржылық сауаттылығын арттыру, сондай-ақ заманауи тұлғаны қалыптастырудағы білімнің, еңбектің және жеке жауапкершіліктің маңызын түсіндіру.

Іс-шара «Құқық» академиялық мектебінің заң ғылымдарының кандидаты, доценті Нұрлан Саламатұлы Ибраевтың бастамасымен және қолдауымен ұйымдастырылды.

Кездесуге спикерлер мен сарапшылар ретінде: Апетова Жаныл Амантайқызы — «Толық адам» әлеуметтік жобасының менеджері және ұйымдастырушысы; Кобеев Дәурен Асқарұлы — Алматы қаласы Полиция департаментінің Есірткі қылмысына қарсы іс-қимыл басқармасының аса маңызды істер жөніндегі аға жедел уәкілі, полиция подполковнигі; Макпал Мұратқызы — «Отбасы банк» АҚ-ның лидер-консультанты; Алсу Сариева — «Бірыңғай жинақтаушы зейнетақы қоры» АҚ (БЖЗҚ) консультанты қатысты.

Кездесу барысында студенттермен рухани-адамгершілік бағдарлар мен Абайдың «Адам бол!» философиясына арналған ашық диалог өтті. Қатысушылар тұлғалық даму, жауапкершілік және қазіргі жастардың құндылықтық бағдарларын қалыптастыру мәселелерін талқылады.

Сондай-ақ сарапшылар студенттерге құқық бұзушылықтардың алдын алу, «Отбасы банк» АҚ бағдарламалары аясында тұрғын үй сатып алу мүмкіндіктері, сондай-ақ БЖЗҚ жүйесіндегі қаржылық жоспарлау мен зейнетақы жинақтарының негіздері туралы пайдалы ақпарат ұсынды.

Студенттер талқыланған мәселелерге жоғары қызығушылық танытып, пікірталасқа белсенді қатысты және сарапшыларға өздерін қызықтырған сұрақтарын қойды.

Өткізілген кездесу «Толық адам» жобасын іске асыру аясында студенттермен ашық диалог орнатуға және олардың құқықтық, қаржылық әрі әлеуметтік сауаттылығын арттыруға бағытталған маңызды алаңдардың біріне айналды.